ასაკის მატებასთან ერთად კანის სიმკვრივე და ელასტიურობა მცირდება. ეს განპირობებულია იმით, რომ 25 წლის შემდეგ ორგანიზმში ჰიალურონის მჟავის გამომუშავების უნარი თანდათან ქვეითდება, რაც იწვევს სახეზე ნაოჭების გაჩენას, სახის ოვალისა და კანის ფერის ცვლილებას.
ასაკთან, ნაოჭებთან და სახის დარღვეულ სტრუქტურასთან საბრძოლველად ერთ-ერთ საუკეთესო საშუალებას წარმოადგენს ინექციური პროცედურები, რომელთა მეშვეობითაც ხდება კანის ღრმა შრეებში ჰიალურონის შეყვანა.
ფილერი ერთ-ერთი ყველაზე პოპულარული და ეფექტური არაქირურგიული გამაახალგაზრდავებელი მეთოდია, ეს არის შემავსებელი, რომელსაც შეუძლია რბილი ქსოვილების გაზრდა, სახეზე ასიმეტრიის გამოსწორება, ასევე, ის უზრუნველყოფს კანქვეშა ქსოვილებისა და ნაოჭების გასწორებას.
არსებობს ორი სახის ფილერი, ესენია-ორგანული(დეგრადირებადი) და არაორგანული(მუდმივი). თანამედროვე ესთეტიკური მედიცინა დღეს უმეტესად ორგანულ, ჰიალურონის მჟავის შემცველ ფილერს იყენებს. ამის მიზეზი არის ის, რომ ჰიალურონი კანის ბუნებრივი შემადგენელი ელემენტია, შესაბამისად, როდესაც ხელოვნურად ხდება მისი შეყვანა კანში, ორგანიზმი ამ ნივთიერებას კარგად ითვისებს და პროცედურის შემდეგ გვერდითი ეფექტების განვითარების რისკიც ნაკლებია.
ხარისხიანი ფილერი უნდა აკმაყოფილებდეს შემდეგ მოთხოვნებს:
- არ უნდა იწვევდეს ანთებით რეაქციებს;
- არ უნდა იწვევდეს ალერგიას;
- ორგანიზმზე არ უნდა ჰქონდეს ტოქსიკური ზემოქმედება
პროცედურის ხანგრძლივობა 30-40 წუთია და შედეგი პროცედურის დასრულებისთანავე შესამჩნევია. ინექციის ეფექტი კი ნარჩუნდება 1,5-დან 2 წლამდე.
ფილერის გამოყენება დასაშვებია 17 წლის ასაკიდან, მხოლოდ სპეციალისტის რეკომენდაციით.
